شارك الخبر
انتشر مقطع فيديو يبيّن مدّعي النبوة الغاني إيبو نوح وهو يمتلك سيارة فارهة نوع مرسيدس موديل 2025، وسعرها يوصل تقريبًا لـ 89 ألف دولار، ويگولون إنه اشتراها من فلوس أتباعه.
هذا الشخص قبل فترة كان يحچي عن طوفان عالمي قريب وحدد له موعد، وخلا ناس هواي تصدّگه، لدرجة إن بعضهم باع ممتلكاته حتى “يحجز مكان للنجاة”.
وبعد ما مرّ الموعد وما صار شي، رجع طلع بفيديو ثاني وكال إن الطوفان تأجّل، بحجة إن الله عطاه وقت إضافي، ودعا الناس يستمرون بالاشتراك ويگول المشروع راح يتوسّع.
وبعد ما هواي ناس صدّگته ومشوا وراه، صدمهم مقطع فيديو إله وهو ينزل من هالسيارة الفارهة، رغم إنه كان طول الفترة الماضية يدّعي الزهد، وحتى لبسه وطريقته بالظهور كانت توحي بالبساطة وترك الدنيا.